- संस्थापन पक्षले पुस मसान्तभित्रै नियमित महाधिवेशन गर्ने गरी तालिका ल्याउने, तर विशेष महाधिवेशन पक्षधरहरूले गत असोज २९ गते पार्टी केन्द्रीय कार्यालयमा दर्ता गराएको विशेष महाधिवेशनको माग सम्बन्धी निवेदन फिर्ता लिनुपर्ने सर्त अघि सारेको छ।
- कांग्रेसको महाधिवेशन विवाद मिलाउन सभापति देउवा र कार्यवाहक सभापति खड्कासहित नेताहरू बिहानैदेखि छलफलमा जुटेका छन्।
- संस्थापन पक्षले पुस मसान्तभित्र नियमित महाधिवेशनको तालिका ल्याउने सर्तसहित विशेष महाधिवेशनको माग फिर्ता गर्नुपर्ने अडान राखेको छ, तर विपक्षी नेताहरूले यसलाई अस्वीकार गरेका छन्।
- महाधिवेशनको विषयमा सहमति खोज्ने प्रयास भइरहे पनि विशेष महाधिवेशन पक्षधरहरूले संस्थापन पक्षको नियतमाथि शंका व्यक्त गरेका छन्।
काठमाडौँ कांग्रेसको महाधिवेशन विवाद मिलाउन नेताहरू सक्रिय भएका छन्। कांग्रेस सभापति शेरबहादुर देउवा र कार्यवाहक सभापति पूर्णबहादुर खड्काले आफ्नो समूह-समूहका नेताहरूसँग बिहानदेखि छलफल गरिरहेका छन्। बिहीबार हुने केन्द्रीय कार्यसमितिको बैठक अगाडि महाधिवेशनको विषयमा एक खालको समझदारी बनाएर निर्णय लिने कसरत भइरहेको छ।
तर अहिलेसम्म निर्वाचन अगाडि महाधिवेशनको सुनिश्चित गराउन संस्थापन पक्षले सकिरहेको छैन। यता महामन्त्री गगन थापा र विश्व प्रकाश शर्माले भने विशेष महाधिवेशनका लागि दबाब दिइरहेका छन्।
देउवानिकट एक नेताका अनुसार पुस मसान्तभित्र नियमित महाधिवेशनकै तालिका ल्याउने, तर विशेष महाधिवेशन पक्षधरहरूले गत असोज २९ गते पार्टी केन्द्रीय कार्यालयमा दर्ता गराएको विशेष महाधिवेशनको माग सम्बन्धी निवेदन फिर्ता लिनुपर्ने सर्त संस्थापन पक्षले राखिरहेको छ।
संस्थापन पक्षको उक्त सर्तलाई महामन्त्रीहरू र विशेष महाधिवेशन पक्षधर नेताहरूले समेत अस्वीकार गरिसकेको अवस्थामा कसरी अघि बढ्ने भन्नेबारे सभापति देउवाले आज बिहानै कार्यवाहक सभापति खड्का र केन्द्रीय सदस्य रमेश लेखकसहित केही नेताहरूसँग छलफल गरेका छन्। सभापतिसँगको छलफलपछि खड्काले महामन्त्रीद्वय थापा र शर्मासँग छलफल गर्ने तयारी गरेका छन्। आजै देउवाले संस्थापन इतर पक्षका अर्का नेता शेखर कोइरालासँग समेत संवाद गर्ने तयारी गरेका छन्।