रुपन्देही । नेपाल प्रहरीको कार्यसम्पादन मूल्याङ्कन ‘पुलिस ब्याटन–२०८३’ मा जिल्ला प्रहरी कार्यालय रुपन्देहीले सर्वोत्कृष्ट स्थान हासिल गरेको छ। प्रहरी उपरीक्षक (एसपी) जनकबहादुर शाहीको नेतृत्वमा कार्यालयले उत्कृष्ट कार्यसम्पादन गर्दै उक्त उपलब्धि हासिल गरेको हो।
प्रहरी सेवा प्रवाह, कार्यालय सञ्चालन, कार्यकुशलता तथा व्यावसायिक दक्षतालगायतका विभिन्न सूचकका आधारमा गरिने कार्यसम्पादन मूल्याङ्कनमा रुपन्देही जिल्ला प्रहरी कार्यालयले उत्कृष्ट स्थान प्राप्त गरेको हो।
यस उपलब्धिले प्रहरी संगठनभित्र प्रभावकारी कार्यसम्पादन, अनुशासन र व्यावसायिक दक्षताको महत्त्वलाई उजागर गरेको छ। साथै, प्रहरी सेवाको गुणस्तर अभिवृद्धि, अपराध नियन्त्रण तथा शान्तिसुरक्षा कायम गर्ने कार्यमा यस्ता उपलब्धिले थप प्रेरणा प्रदान गर्ने अपेक्षा गरिएको छ।
जिल्ला प्रहरी कार्यालय रुपन्देहीको यस सफलतामा कार्यालय प्रमुख प्रहरी उपरीक्षक जनकबहादुर शाहीसहित कार्यरत प्रहरी कर्मचारीहरूको भूमिका महत्त्वपूर्ण रहेको छ। उत्कृष्ट कार्यसम्पादनले नागरिकमैत्री प्रहरी सेवा प्रवाह तथा प्रहरीप्रतिको जनविश्वास अभिवृद्धिमा थप योगदान पुर्याउने अपेक्षा गरिएको छ।